Tomás, o bromista

“Tomás o bromista” reúne todos os ingredientes para gustarlle ao público infantil, invitándoo a que se involucre e sexa partícipe do relato: é un texto narrativo aderezado con rimas, repeticións e fórmulas acumulativas; e sobre todo, o humor, as sorpresas e a creatividade están presentes de principio a fin. O protagonista é un neno traveso ao que lle encanta disfrazarse para gastar bromas a quen vai de visita á súa casa. Reutilizando calquera material usado é quen de ataviarse coma un crocodilo, un león, unha abella, un elefante… Pero quen ri o último, ri mellor, pensan os destinatarios de tantos sustos. O ton lúdico do texto de Jorge Rico Ródenas refórzase coa profusión cromática nas ilustracións de Anna Laura Cantone, que combinan a técnica do collage de obxectos e texturas, a acuarela, os lapis e as ceras de cores. Os seus personaxes son grotescos e extravagantes, bosquexados con trazos finos e dinámicos. Diversión e desenfado nun álbum que vai de sobresalto en sobresalto.