O suxeito posmoderno. Entre a estética e o consumo

Premio Ramón Piñeiro de Ensaio 2005.
Orixinal combinación de achegas de disciplinas científicas coma a neurobioloxía co alento especulativo e filosófico, O suxeito posmoderno aborda desde Galicia cuestións estreitamente relacionadas coa sociedade contemporánea.
A análise da peculiaridade posmoderna permítelle á autora propoñer a diagnose dalgúns dos temas que forman parte do debate actual, entre eles o efecto dos medios de comunicación na percepción que o individuo ten da realidade.
Como inflúen os procesos de comunicación no individuo contemporáneo? A primacía da virtualidade, a sociedade da imaxe que absorve e rexe o mundo presentándoo para o consumo, pode revelar as estrías sociais que latexan na realidade actual? Que roteiros de emancipación son factibles para un individuo fragmentado, vulnerable e manipulable?