As alumnas

O xurado do Premio Nacional de Literatura Dramática salientou a obra por ser un eloxio á docencia que ensina sobre a dúbida e o debate e pola recuperación dunha muller, símbolo do ensino moderno,
igualitario e transformador que propuña a II República. Esta peza de teatro foi escrita a partir dunha proposta de Fran Rei como representante de Culturactiva. Elvira Fontao e Rosa Lires, antigas alumnas de María Barbeito, volven atoparse na data da morte da mestra, no ano 1970.
Xa son mulleres. Atrás queda a infancia, o mundo que lles abriu a mestra antes de que o Comité de Depuración a afastase do seu traballo na escola. Así, a memoria, as lembranzas que se van desenvolvendo neste xogo de persoas adultas que é o teatro, fannos descubrir como as decisións que se tomaron, e o medo e a rebeldía, marcan o seu destino.