A cuestión política na persoa e no pensamento de Martin Heidegger

Neste ensaio abórdase a polémica da dicotomía entre pensamento e política en Heidegger co obxectivo de proporcionarlle unha resposta ou, cando menos, fornecer sobre ela unha perspectiva filosófica que afecta ao corazón mesmo do pensamento heideggeriano. Basicamente, despois dunha breve referencia a certos feitos históricos, o traballo divídese en tres partes: o comentario de algúns textos heideggerianos ineludibles de contido político, presentación do debate filosófico sobre o asunto Heidegger desde a selección duns poucos autores significativos e, por último, o autor ofrece unha visión da conexión entre filosofía e política en Heidegger que explicaría o seu compromiso ideolóxico co nacionalsocialismo.