Por que as nenas e os nenos?

A obra máis xenuína de Francesco Tonucci, un punto de inflexión na traxectoria deste pedagogo de sona internacional arredor dos dereitos e da dignidade da infancia. Trátase dun ensaio imprescindible que bota luz sobre as grandes contradicións do mundo actual ante temas tan importantes como a educación e a infancia. Non é a presentación dun proxecto educativo, explica o autor, senón “un testemuño emocional, persoal e profesional” logo de reflexionar arredor da necesidade de ver as nenas e os nenos como seres con talento que merecen o seu propio espazo na sociedade. “Cada erro dos nenos é unha invención”, sostén o autor. Cando se trabucan están inventando algo, polo que os erros deberían ser un foco de atención na escola, unha fiestra aberta ao seu mundo secreto. Tonucci rexeita a antiga idea sobre que o importante comeza aos seis anos coa aprendizaxe das letras e dos números e insiste en que o relevante está ao principio, nos primeiros anos, por iso é fundamental que se dea unha resposta á altura.