Os madrileños non sempre veñen en agosto

Para curar as súas feridas, unha moza que vive en Madrid e que vén dunha ruptura matrimonial retorna á súa aldea natal a mediados do mes de maio. O habitual é que os madrileños volvan en agosto e o feito produce estrañeza na veciñanza. Nada máis chegar soubo que Antón e Paulo, amigos da nenez e compañeiros da escola, están anoxados entre eles de xeito irreconciliábel. A curiosidade obrígaa a investigar as causas desa inimizade, sen sospeitar as consecuencias que esas indagacións terían para os tres.