O teito é de pedra

“Naqueles primeiros días de xullo de 1936, don Antonio Cerqueira, elegantemente vestido co seu traxe de xastrería, chaleco, gravata e chapeu, comía na terraza do Bar Canido dúas nécoras con suma destreza e rapidez, coma se levase toda a vida manipulando criaturas minúsculas e indefensas”. Así comeza esta novela “escrita coa pel e coas entrañas da emoción para homenaxear a todas as persoas que deron a súa vida pola democracia ou que padeceron en calquera das súas formas a represión franquista”, explica a editora. Tomando como referencia o libro Memoria dunha parroquia republicana, de Bernardo Vázquez Acuña, Álex Alonso retrocede á época da República e crea personaxes baseados en persoas reais da zona de Vigo (San Miguel de Oia, Coruxo e outras parroquias limítrofes).