O talento do señor Ripley

Tom Ripley sobrevive en Nova York grazas ao seu enxeño para a estafa mentres soña cunha vida fácil. O millonario Herbert Greenleaf ofrécelle unha viaxe a Europa para traer de volta o seu fillo Dickie, quen leva unha vida bohemia e pracenteira na costa italiana. Ripley comeza a argallar plans para sacar todo o partido posible da súa experiencia en Italia ata o extremo de desenvolver unha relación morbosa e sedutora co seu novo amigo: adopta os seus mesmos gustos e chega a vestirse coa roupa de Dickie, quen entón comeza a rexeitalo. Hipnótica e brillante, “O talento do señor Ripley”, gañadora en 1957 do Grand Prix de Littérature Policière, é unha das obras mestras do suspense que transcendeu os códigos do xénero e que supuxo o nacemento do sociópata máis fascinante da literatura universal. A tradución é de María Alonso Seisdedos.