Insubmisión ambigua. Voces e relatos amén da monosexualidade

“Benvide a esta sorte de asemblea-aquelarre de corte libertario”. Así comeza a presentación deste texto que mantén que “se a fluidez ou a ambigüidade se senten como ameaza en tantos espazos débese, en gran medida, a romperen cos binarismos”. “Por iso, nós reivindicámonos ambigües, confuses, inestables, indóciles, desobedientes e problemátiques, porque se iso molesta débese, xustamente, a que fai cambalear todos os sistemas: o cisheterosexual, o monosexual e o monógamo (…) Aquí poderás encontrar textos de persoas que, tal como fixeron no seu momento quen representaron o fenómeno da insubmisión, se negan cada día a se incorporar a filas, pero tamén a declarar obxección de conciencia”. Así, este “libro-aquelarre” ofrece desde textos máis biográficos e políticos, ata outros máis literarios “que contribúen á creación dun imaxinario artístico e literario non-monosexual, falamos desde e para a periferia, tamén territorial e lingüística”.