Un corvo en Caldaloba

Texto que nace dunha clara vontade de divulgación da historia; pensado para representar en centros escolares e que agocha tamén un propósito reivindicativo que pon no punto de mira a necesidade de velar polo patrimonio da Terra Chá seguindo a senda da Plataforma pola Restauración da Fortaleza de Caldaloba. A obra está dedicada a Xosé Luís García Mato, persoa que inspirou á autora á hora de poñer título á peza teatral e que ela converteu en narrador omnisciente dos feitos que acontecen nos últimos días de asedio á fortaleza ao remate do século XV, con Constanza de Castro, filla do mariscal Pardo de Cela, e o seu home, Fernán Ares de Saavedra, como protagonistas principais. Esta peza dramática en tres actos tivo unha primeira edición non venal a cargo do Instituto de Estudos Chairegos e sae agora con ilustracións de Sofía Naseiro ideadas para amosar a vestimenta das personaxes.