Sobre a vida e a morte

Só unhas poucas persoas teñen o que se entende por unha “boa morte”. Predominan os casos nos que o deceso se produce nun contexto agresivo co paciente, sendo obxecto de manipulación e falta de respecto, cos acompañantes sometidos a un duro sufrimento. Iona Heath aborda a definición deste concepto e invita a pensar que forma de morrer queremos para nós e os seres queridos. Entre o paciente terminal e o doutor establécese unha estreita relación que conleva unha ardua tarefa: como dialogar con quen está próximo a marchar, como apoialo nese proceso inexorable sen sometelo a un inútil ensañamento terapéutico, como facer máis amable e digna a transición da vida á morte. O escritor John Berger asina o limiar e tamén presenta “Doce teses sobre a economía dos mortos”, con fondos pensamentos filosóficos.