O meu piollo e mais eu

Desde o mesmo título, O MEU PIOLLO E MAIS EU lanza un desafío ao lector, un reto amable e divertido, unha invitación e incitación á súa lectura. E é que o título desta obra pica e incomoda igual que o fan os piollos cando se aloxan nas nosas cabezas. Pero adoita suceder que, en ocasións, o incómodo tamén resulta atractivo.
Quen o diría! Un PIOLLO, un bicho tan pequeno, tan molesto, tan parasito, tan azoute de nais, pais e profesorado… convertido en protagonista e heroe dun álbum infantil. E non, non é o malo desta película. De selo, a nosa obra estaría encabezada por outro título como, por exemplo: EU CONTRA O PIOLLO ou DUELO NA MIÑA CABEZA pero non é o caso.