Alianza

“Alianza” fala da unión, do amor, da atenta compaña na viaxe. Unha viaxe cara á sorpresa e o descoñecido na que cómpre ter os sentidos acesos. Un decurso persoal no que un intre pode durar eternamente na contemplación da fermosura. Pero fala tamén da distancia, da perda, do oco que existe entre o ser amante e o amado: esa carencia na que se sustenta o eros. Todo ganduxado con fíos de superación, de alianza, cos que esta proposta cose, con delicadeza extrema, as dúas faces do amor.