O osiño Chispa

Álbum tenro e divertido arredor da importancia da escola e da aprendizaxe, da necesidade de ir adquirindo autonomía persoal e ter en conta os consellos dos maiores. Aventureiro, alegre e decidido, o protagonista achégase unha mañá onda a súa nai para dicirlle que vai deixar a escola porque xa é maior e quere traballar… Pero cociñar, coser, pintar a porta da casa ou fabricar unha cadeira resultan ser tarefas máis difíciles do que imaxinaba. Chispa descoñece que a madurez é cuestión de tempo. Canda o texto poético e descritivo de José Antonio Abad, as ilustracións de Rosa Osuna achegan calidez, detallismo e sinxeleza nos trazos, ademais dunha acertada combinación cromática.