Xácome o fatalista e o seu amo

Voltaire, Rousseau, Diderot. Século XVIII, Francia, luz do mundo.
Mais Diderot é o creador, o director, o artífice da Enciclopedia, ou “Dicionario razoado das ciencias, das artes e dos oficios”. Os seus poderosos 28 volumes in folio, 17 de texto e 11 de soberbios gravados técnicos, son a base fundamental e fundadora da civilización común da Humanidade. Esa que uns anos despois adoptou o lema glorioso que nos guía: Liberdade, Igualdade, Fraternidade.
E ademais, Diderot é un delicioso escritor, que co seu “Xácome” nos leva a cabalo da fantasía polos meandros dun río con mil revoltas e afluentes: contos lixeiros, historias tremendas, filosofía, moral laica, pinchacarneiros, bromas e veras. Libro indefinible, divertido, marabilloso. Unha das novelas —ou conversas— máis fermosas do mundo.