Tres en raia

Tres en raia é a metáfora que tres mozos ourensáns utilizan para selar unha amizade que se propoñen perpetuar no futuro. Despois de décadas de separación, a enfermidade de Guillerme propicia o reencontro con Antonio e Gabriel e o punto de partida para achegar a historia da súa amizade nun Ourense convertido tamén en personaxe. É o relato dun tempo feliz naquela cidade, de aprendizaxe á vida, de lecturas en común que permanecen no recordo e que co tempo se relacionan cos seus particulares devires existenciais. Tamén un relato dunha evolución vital na que a insatisfacción, marcada por unha culpa que, como un crime, non chegan a esquecer nin a resolver, vai ser o resultado das súas particulares condenas.