Dicionario da nova literatura galega. 86 voces responden un inquérito, 1969

Este dicionario comezou a fraguarse a finais da década dos anos sesenta do pasado século a través dunha enquisa que o profesor Xesús Alonso Montero distribuíu entre as persoas do mundo literario galego que non tiñan obra publicada antes do ano 1936. Oitenta e seis persoas responderon aquelas preguntas que permiten coñecer multitude de datos biográficos e, ao tempo, deseñan as preocupacións e expectativas dun tempo moi concreto da historia literaria e cultural. Máis de cincuenta anos despois, velaquí aquel proxecto en forma de libro, en edición de Ramón Nicolás. Este singular dicionario posibilita preguntarse que cambiou na cultura galega nestes últimos cincuenta anos e engade, ademais, unha rica e valiosa documentación bibliográfica e epistolar.