Dezanove comunas e un aeroporto

Hai varios xeitos de contar unha cidade, de querela ou de odiala, ou simplemente de habitala, mais Daniel Ugarte entende que só escribindo sobre ela é que se chega a descubrila na súa totalidade. Opta aquí por contala alén dos tópicos. Faino rompendo a escribir vinte anécdotas entrelazadas, situando cada unha delas nunha sección administrativa dunha aglomeración que se artella, como refire o título, de dezanove comunas e un aeroporto. Bruxelas é outra, ou cando menos distinta de como adoitan describila e consegue darlle un outro ar, o de cidade cosmopolita e próxima, poliédrica e agradábel para vivir e para soñar, sobre todo para soñar.